اسلام آباد پاکستان میں مصری سفیر طارق ڈہرورو نے وزارت خارجہ میں وزیر خارجہ مخدوم شاہ محمود قریشی سے ملاقات کی جس میں دو طرفہ تعلقات خطے کی صورتحال سمیت باہمی دلچسپی کے امور پر تبادلہ خیال کیا گیا۔ بدھ کو وزیر خارجہ نے مصری سفیر کو پاکستان میں تعیناتی اور بطور سفیر ذمہ داریاں سنبھالنے پر مبارکباد دی فریقین نے پاکستان اور مصر کے مابین موجود گہرے دوطرفہ تعلقات پر اطمینان کا اظہار کیا۔شاہ محمود قریشی نے کہا کہ اقوام متحدہ اور او آئی سی، ڈی 8 جیسے بین الاقوامی فورم پر پاکستان اور مصر کے مابین گہرے روابط کا ہونا قابل تحسین ہیں۔انہوں نے کہا کہ پاکستان اور مصر کے مابین باہمی دلچسپی کے مختلف شعبوں میں اقتصادی تعاون کے فروغ کے لئے مشترکہ کاوش بروئے کار لانے کی ضرورت ہے ۔وزیر خارجہ نے پاکستان اور مصر کے مابین کی قیادت اور عوام کی سطح پر رابطے کو بڑھانے کی ضرورت پر زور دیا۔وزیر خارجہ نے مقبوضہ جموں کشمیر میں جاری انسانی حقوق کی سنگین خلاف ورزیوں کی طرف مصری سفیر کی توجہ دلائی۔